A Oficina Acelera Peme da Cámara de Comercio de Santiago de Compostela atendeu a máis de 900 empresas desde que iniciou a súa actividade, fai máis dun ano, en xaneiro de 2022, a través do seu servizo de asesoramento e acompañamento para a implementación de procesos dixitais, así como de xornadas de capacitación e sensibilización en liña vinculados á dixitalización.

Neste sentido, a Oficina atende, de forma gratuíta e personalizada, a pequenas e medianas empresas, micropemes, autónomos e emprendedores da demarcación da Cámara de Comercio de Santiago de Compostela e presta servizos de:
• Asesoramiento e resolución de consultas sobre transformación dixital.
• Organiza talleres sobre diversos temas vinculados á dixitalización.
• Informa sobre financiación e axudas.

As principais consultas das empresas estiveron relacionadas co financiamento e axudas para a dixitalización. Neste eido, cabe destacar as axudas do Programa Kit Dixital (RED.ES) coas que esta Oficina colabora activamente na súa difusión e información, pero tamén as axudas de ámbito rexional, provincial e local.
A estratexia dixital, o márketing dixital e as redes sociais, presencia web, comercio electrónico, ferramentas de xestión de clientes e identidade dixital foron outras das temáticas que conforman o conxunto das consultas atendidas.
Se atendemos ao tipo e tamaño das empresas que solicitaron os servizos da Oficina Acelera Peme principalmente foron autónomos e empresas con menos de dez traballadores. O sector de actividade máis común é o de actividades profesionais científicas e técnicas e o comercio, predominando as empresas con menos de 5 anos de antigüidade.

Todos os servizos que presta a Oficina Acelera Peme da Cámara de Comercio de Santiago de Compostela son gratuítos para as empresas e están financiados con fondos FEDER da Unión Europea, no marco do Programa Operativo Plurirrexional de España FEDER 2014-2020 (POPE) baixo o lema “Unha maneira de facer Europa” e por RED.ES