A Cámara de Comercio de Santiago e ABANCA asinaron unha nova edición da súa iniciativa conxunta de compromiso co emprendemento e a consolidación empresarial, impulsando o apoio ao tecido produtivo da capital autonómica e a súa área de influencia. O acordo foi asinado pola Presidenta da entidade cameral, María Pais, e o director de Negocio Institucional en Galicia, España Norte e Portugal de ABANCA, José Lino Comesaña.

A través deste convenio a Cámara compostelá realizará unha serie de xornadas formativas e encontros empresariais sobre temas de actualidade co obxectivo de mellorar a competitividade empresarial e o apoio ás novas iniciativas emprendedoras.

“Trátase dun acordo froito do compromiso da entidade cameral coa dinamización do tecido empresarial e co impulso do desenvolvemento económico das empresas da súa demarcación cameral. Algo que vimos facendo da man de ABANCA desde hai moitos anos” sinalou María Pais. Pola súa banda, José Lino Comesaña sinalou que “o obxectivo de ABANCA é seguir amosándonos próximos ás nosas empresas e emprendedores e axudarlles coas súas necesidades para que poidan afrontar os retos que demanda a situación económica actual”.

Ademais, ABANCA oferta a través do convenio unhas condicións financeiras personalizadas e adaptadas ás necesidades dos autónomos, micropemes, pemes e startups co obxectivo de que ningún proxecto viable se frustre por falta de financiamento.