A Secretaria de Estado de Enerxía, Sara Aagesen, asegurou que ante o impacto da guerra en Ucraína nos prezos da enerxía “a mellor resposta é apostar polo gran recurso de España que son as renovables”.

Durante a súa intervención na Comisión de Enerxía da Cámara de Comercio de España, Aagesen valorou positivamente o paquete de Comunicación REPowerEU, presentado pola Comisión Europea coas recomendacións que poden utilizar os países para facer fronte aos prezos da electricidade, pero sinalou que se deben tomar medidas de maneira urxente.

Aagesen presentou aos membros da Comisión de Enerxía o PERTE de Enerxías Renovables, Hidróxeno Renovables e Almacenamento ( ERHA) e reiterou que se sitúa en liña coa estratexia industrial europea de facer unha transición á independencia enerxética.

O PERTE, dotado cun orzamento de 16.370 millóns, dos cales 6.920 millóns procederán dos fondos NEXT Generation, contén 25 medidas transformadoras encamiñadas ao desenvolvemento da tecnoloxía, coñecemento, capacidades industriais, e novos modelos de negocio; e 17 medidas facilitadoras en catro áreas de actuación: dixitalización; capacitación, formación e emprego; transición enerxética e mobilidade con gases renovables.

O PERTE, que se desenvolverá ata 2026, estruturouse en tres fases: desenvolvemento e consolidación de I+D; conversión en capacidades tecnolóxicas, industriais ou de modelo de negocio específicas respondendo a necesidades domésticas ou de exportación; e unha terceira, de despregamento dos sistemas a escala comercial contribuíndo a un cambio da matriz enerxética.

Aagesen reiterou que nos criterios de selección de proxectos non só figura a eficiencia económica, tamén a “escalabilidade e a innovación”, así como a integración territorial e a participación das pemes. A Secretaria de Estado de Enerxía sinalou, ademais, que se establecerá un sistema de seguimento, avaliación e análise do impacto do PERTE en toda a cadea de valor e que nun futuro, trabállase unha etiquetaxe específica de tecnoloxía española asociado.

A Secretaria de Estado subliñou que “España é un referente en produción e aproveitamento de hidróxeno renovable, con materia prima e capital humano preparado”. Neste sentido, o obxectivo do PERTE é que España poida producir en 2030 o 10% de todo o hidróxeno verde da Unión Europea, así como fomentar a innovación tecnolóxica, social e de novos modelos de negocio. A Secretaria de Estado de Enerxía tamén adiantou o lanzamento inminente, nas próximas dúas semanas, da folla de roteiro do biogás.